Höfði friðarsetur hlýtur styrk

Höfði friðarsetur Reykjavíkurborgar og Háskóla Íslands hlaut nýverið styrk úr sjóði The Joint Committee for Nordic Research Councils in the Humanities and Social Sciences (NOS-HS). Um er að ræða styrk til undirbúnings rannsókna á sviði lýðræðis og fjölmiðlunar í breyttu pólitísku umhverfi. Styrkurinn mun nýtast til þess að halda vinnustofur þar sem rannsóknarefnið verður mótað frekar.

Aðaláhersla verður lögð á pólitíska orðræðu, lýðskrum og birtingarmyndir hatursorðræðu á samfélagsmiðlum. Gert ráð fyrir að verkefnið hefjist í janúar 2018 en fyrsta málstofan kemur til með að fara fram í Norrköping í Svíþjóð. Þar verður aðaláhersla á pólitíska orðræðu norrænu stjórnmálaflokkanna og hvernig hún endurspeglast í hatursorðræðu og andúð á innflytjendum. Önnur málstofan fer fram í Helsinki í Finnlandi í nóvember 2018 en þar verða samsæriskenningar, stjórnmál eftirsannleikans og aukin andúð í garð yfirvalda og opinberra stofnana í brennidepli. Verkefnið endar svo með málstofu hér á landi í mars 2019 þar sem sjónum verður beint að því hvernig breyta megi orðræðunni og áhersla lögð á þátttökulýðræði og aukna aðkomu almennings að mikilvægum ákvörðunum.

Háskóli Íslands leiðir verkefnið en samstarfsaðilar eru Háskólinn í Linköping í Svíþjóð og Háskólinn í Helsinki í Finnlandi. Pia Hansson, forstöðumaður Höfða Friðarseturs, Auður Örlygsdóttir, verkefnisstjóri setursins, Guðmundur Hálfdánarson, prófessor í sagnfræði og forseti Hugvísindasviðs, Jón Ólafsson, prófessor í heimspeki og Kristín Loftsdóttir, prófessor í mannfræði við Háskóla Íslands, vinna að verkefninu fyrir hönd Höfða friðarseturs og Háskóla Íslands, í samvinnu við fræðimenn við samstarfsháskólana. Samstarfinu er ætlað að efla rannsóknir á sviði félags- og hugvísinda og ein helsta afurð verkefnisins verður að sækja í erlenda samkeppnissjóði fyrir frekari rannsóknum á sviði lýðræðis, fjölmiðlunar og pólitískrar orðræðu á Norðurlöndunum.