Beint streymi

Á meðal fyrirlesara eru: JJ Bola, talsmaður UNHCR og ljóðaslammari, Pia Oberoi, sérfræðingur hjá Mannréttindastofnun Sameinuðu þjóðanna, Sophia Mahfooz, framkvæmdastjóri SVIP, Nazanin Askari, femínisti og aðgerðarsinni, Kathy Gong, frumkvöðull og framkvæmdastjóri og meðstofnandi Wafa Games, Adam Elsod, stjórnarformaður og stofnandi The Young Republic og Harald Quintus-Bosz, kennari við D-Lab í MIT og CTO hjá Cooper Perkins.

Hér má nálgast dagskrá ráðstefnunnar.

JJ Bola er einn af frummælendum ráðstefnunnar 10. október. JJ er rithöfundur, ljóðaslammari, fyrirlesari og fyrrum flóttamaður frá Austur- Kongó en hann flúði til Bretlands þegar hann var 7 ára. JJ hefur gefið út þrjú ljóðasöfn og fyrsta skáldsaga hans, No Place to Call Home, kom út í Bretlandi árið 2017. Hann var einn af rithöfundum Spread the Word´s árið 2017. JJ hefur komið fram víðsvegar í Bretlandi og erlendis, bæði sem fyrirlesari og ljóðskáld. Hann er talsmaður UNHCR og hefur einnig komið fram á þeirra vegum, meðal annars á World Economic Forum.

Dr. Pia Oberoi er sérfræðingur hjá Mannréttindastofnun Sameinuðu þjóðanna. Hún leiðir vinnu stofnunarinnar þegar kemur að mannréttindum innflytjenda og flóttafólks og er ráðgjafi mannréttindafulltrúa varðandi stefnumótun og lagaleg málefni tengd fólksflutningum og mannréttindum. Áður hefur Pia unnið hjá alþjóðaskrifstofu Amnesty International þar sem hún sá um vinnu samtakanna sem sneri að fólksflutningum og mannréttindum. Einnig hefur hún starfað sem ráðgjafi fyrir hugveitur og frjáls félagasamtök víðsvegar um heim. Pia er sérfræðingur í alþjóðamannréttindalögum og stefnumótun tengdri innflytjendum og flóttafólki, en hún hefur skrifað fjölmargar greinar um málefnið. Hún er með doktorsgráðu í alþjóðasamskiptum frá Oxford-háskóla. Doktorsritgerð hennar “Exile and Belonging: Refugees and State Policy in South Asia” var gefin út af Oxford University Press árið 2006.

Kathy Xiaosi Gong, ein af fremstu frumkvöðlum Kína og meðstofnandi og framkvæmdastjóri Wafa Games, verður með erindi á ráðstefnunni 10. október. Hún var valin ein af 35 fremstu fumkvöðlum heims undir 35 af MIT árið 2017 og varð skákmeistari í Kína aðeins 13 ára gömul. Kathy var í stjórn og ein af stofnendum World Economic Forum Global Shapers Community 2013-2016 og meðstjórnandi APEC Women Leadership Forum 2013 - 2014.

Adam Elsod mun flytja erindi á ráðstefnunni 10. október. Hann er verðlaunaður aðgerðarsinni, kennari og samfélagslegur frumkvöðull. Adam er stjórnarformaður samtakanna The Young Republic sem vinna við að valdefla ungt flóttafólk í Evrópu, meðlimur ráðgjafaráðs Evrópuráðsins, leiðbeinandi hjá the European Youth Forum og meðstofnandi samtakanna Network for refugee voices. Adam hefur starfað síðustu 10 ár að mismunandi verkefnum sem tengjast lýðræði, mannréttindum og valdeflingu ungs flóttafólks í Mið-Austurlöndum, Norður - Afríku og Evrópu.

Sophia Mahfooz er ein af fjölmörgum áhugaverðum ræðumönnum á ráðstefnunni 10. október. Sophia flúði til London frá Afganistan með fjölskyldu sinni þegar hún var ung að aldri en flutti seinna til San Fransisco. Þar hefur hún unnið sem framkvæmdastjóri Girls in Tech, sem vinnur að menntun og valdeflingu kvenna. Hún hefur einnig unnið hjá fjölda alþjóðlegra tæknifyrirtækja eins og Facebook, Apple og Cisco, að verkefnum sem miða að því að veita innflytjendum aukin tækifæri á vinnumarkaði. Í núverandi verkefnum sínum nýtir Sophia þekkingu sína á tæknigeiranum, menntun og stefnumótun til að bæta aðstæður fólks sem hefur þurft að flýja heimili sín. Hún rekur SVIP, The Silicone Valley Internship Programme og situr í nefnd í breska þinginu sem vinnur að verkefnum tengdum Afghanistan.

Harald Quintus-Bosz er einn af fyrirlesurum á ráðstefnu Höfða friðarseturs þann 10. október nk. Harald er kennari við D-Lab í MIT, CTO hjá Cooper Perkins og einn af erlendum fyrirlesurum Snjallræðis. Harald hefur komið að fjölmörgum mikilvægum nýsköpunarverkefnum og hefur meðal annars tekið þátt í að þróa nýjungar sem hafa nýst til þess að auðvelda líf fólks í flóttamannabúðum.