Umboðsmenn friðar

Sumarnámskeið Höfða friðarseturs Reykjavíkurborgar og Háskóla Íslands fer fram í fyrsta sinn dagana 19.-23. júní 2017 í Fellaskóla. Námskeiðið er ætlað 10 til 12 ára börnum af ólíkum uppruna, bæði börnum sem eru fædd hér og uppalin og börnum af erlendum uppruna. Markmiðið með námskeiðinu er að vinna gegn fordómum og mismunun með því að stuðla að auknum samskiptum barna sama hvaðan þau koma og efla færni þeirra í að greina og leysa úr ágreiningi á friðsamlegan hátt. Námskeiðið er haldið í samstarfi við skóla- og frístundasvið Reykjavíkurborgar, Rauða kross Íslands og Háskóla unga fólksins.


HopmyndUmbodsmenn


Námið byggist á leikjum, verkefnum og listrænni tjáningu og kennslan fer fram bæði úti og inni. Fulltrúar frá Landvernd, Félagi Sameinuðu þjóðanna og Rauða krossi Íslands eru með fræðslu á námskeiðinu og unnið er verkefni sem tengist barnabókinni Flugan sem stöðvaði stríðið, í samstarfi við höfund hennar, Bryndísi Björgvinsdóttur, og nemendur við Listaháskóla Íslands.


Uti


Fyrstu friðarfulltrúar Íslands, sem hlotið hafa friðarfræðslu á sumarnámskeiði Höfða friðarseturs Reykjavíkurborgar og Háskóla Íslands, verða útskrifaðir við hátíðlega athöfn í Höfða föstudaginn 23. júní nk.


Líf Magneudóttir, forseti borgarstjórnar, og Jón Atli Benediktsson, rektor Háskóla Íslands, útskrifa fyrstu friðarfulltrúa landsins. Eliza Reid, forsetafrú, tekur á móti mikilvægum skilaboðum frá fyrstu umboðsmönnum friðar hér á landi fyrir hönd forseta Íslands, ásamt Jóni Atla Benediktssyni, fyrir hönd Háskóla Íslands, og Líf Magneudóttur, fyrir hönd borgarstjórnar Reykjavíkurborgar.

 

Börnin sýna afrakstur vinnu sinnar í samstarfi við leiðbeinendur á námskeiðinu.

 

Að útskrift lokinni halda fyrstu friðarfulltrúar Íslands í útskriftarferð í Viðey.