Opnun HÖFÐA Friðarseturs

Þann 7. október næstkomandi hefst starfsemi HÖFÐA Friðarseturs Reykjavíkurborgar og Háskóla Íslands með opnu málþingi í Hátíðasal Háskóla Íslands. Málþingið hefst kl. 13:00 með opnunarávarpi Guðna Th. Jóhannessonar, forseta Íslands, og stendur til kl. 18:00.


Aðalræðumenn eru Steve Killelea, stofnandi og stjórnarformaður Institute for Economics and Peace og höfundur Global Peace Index og Annika Bergman Rosamond, dósent í stjórnmálafræði við Háskólann í Lundi. Auk þeirra munu Jón Atli Benediktsson, rektor Háskóla Íslands, Lilja Alfreðsdóttir, utanríkisráðherra og Dagur B. Eggertsson, borgarstjóri Reykjavíkur ávarpa málþingið.


Meðal annarra þátttakenda eru  Michele Acuto, prófessor í alþjóðasamskiptum og þéttbýliskenningum við University College í London, Melanie Greenberg, forstöðumaður Alliance for Peacebuilding, hinn margrómaði leikstjóri Darren Aronofsky og sýrlenska útvarps- og heimildamyndagerðarkonan Obaidah Zytoon.


Alþjóðleg kvikmyndahátíð í Reykjavík, RIFF, stendur að fyrri pallborðsumræðum í samstarfi við HÖFÐA Friðarsetur þar sem sjónum verður beint að áhrifamætti miðlunar og hvernig nýta megi mátt kvikmyndarinnar til þess að hafa áhrif á friðarhorfur í heiminum í dag. Í síðari pallborðsumræðum verður fjallað um aukið mikilvægi borga á alþjóðavettvangi og hvernig borgarar geta stuðlað að friði, hvort sem er í sínu nærumhverfi eða á heimsvísu.


HÖFÐI Friðarsetur er samstarfsverkefni Reykjavíkurborgar og Háskóla Íslands og er vettvangur fyrir þverfaglegt og alþjóðlegt samstarf með áherslu á hlutverk borga, smáríkja og almennra borgara í að stuðla að friði, friðarmenningu, afvopnun og friðarfræðslu.


Hér má nálgast dagskrá opnunarmálþings HÖFÐA Friðarseturs.


Facebook-síða HÖFÐA Friðarseturs www.facebook.com/ReykjavikPeaceCentre/


Vefur HÖFÐA Friðarseturs verður formlega opnaður þann 7. október 2016.